गुज मनाचे

मतदार राजा (?) ताई माई दादा आप्पा आबा तात्या म्हणत फिरत होता! दिसायला साधाच, पण भविष्य आमचं त्याच्या हातात मागत होता! दिसायचा अधे मधे कडक कपड्यात फिरताना, आताशा रोज येतोय, दुसऱ्याच्या गाडीवर बसून हाल आमचे विचारायला! नाव घेतोय सगळ्यांची, हात धरतोय प्रत्येकाचा दोन घास खाऊन पोट भरलं म्हणतोय प्रत्येकाला! सोपा आहे डाव त्याचा, खेळ खेळतोय भावनांचा ठाव घेऊन मनाचा, धंदा करणार पुढच्या पाच वर्षांचा! मतदार राजा, बाजूला टाकून शाळेत नागरिक शास्त्राला, घोटला आहेस तू गळा स्वतःच्या भविष्याचा! कळतंय का तुला, काय मागतो आहे तुझा नेता? मत देऊन हुशारीने, होणार का रे तू खराखुरा राजा? -गोसाव्यांचा योगेश २१ ऑक्टोबर, २०२४

कळप लाचारांचा लाचारांचा कळप इकडून तिकडे फिरत होता, हिरवा चारा जास्त दिसेल तिकडे लगेच वळत होता! कुटुंब, नाती-गोती, परिचित, अपरिचित, सगळे बांधून दावणीला चाऱ्यासाठी वणवण करत अहोरात्र फिरून पण थकत नव्हता! चूक त्याची नव्हतीच मुळी, चूक होती तुमची आमची, शिवार सगळा मोकळा करून गाव आपण विकला होता! तो आपले कुरण पाच वर्षांसाठी राखत होता! मालक आपण त्यांचे रहाटगाडग्यात गुंतून त्याचा डाव डोळे झाकून पाहत होता! -गोसाव्यांचा योगेश २१ ऑक्टोबर, २०२४