निघालीच आहेस तर

निघालीच आहेस तर

निघालीच आहेस तर मागे तरी नको वळून पाहुस,

न होणाऱ्या गोष्टींची जाताना चाहूल नको देऊन जाऊस!

उनाड माझं मन उगाच भरकटत जात,
हसण्या वागण्या बघण्याच्या तुझ्या सवयींना प्रेम समजू पाहत!

चाललीसच तर थोडं थांबून पहा,
खरचं जायचं ना एकदा विचार करून पहा!

नाही आलीस माझ्या सोबत तरी चालेल मला,पण निदान तू स्वतः सोबत तरी राहा!

निरोप द्यायला आलो होतो, तो मी सल्ला देऊन जातोय!
डोळ्यातलं तुझं वादळ शांत करू पाहतोय!

काही लढाया जिंकण्यासाठी काही लढाया हराव्या लागतात!
आयुष्याचा सोबती शोधायला माझ्या सारखेच कामी येतात!

-योगेश गोसावी
३ जून, २०१९